బాబుకున్న ఓపిక లేదా?: పొత్తులపై బర్దన్

హైదరాబాద్: రాష్ట్రంలో ఏ పార్టీతో పొత్తు పెట్టుకుంటారనే విషయాన్ని సిపిఐ ప్రధాన కార్యదర్శి ఎబి బర్దన్ తేల్చలేదు. చంద్రబాబుతో భేటీ అనంతరం ఆయన మీడియా ప్రతినిధులతో మాట్లాడారు. ప్రజారాజ్యంతో పొత్తు పెట్టుకుంటారా, తెలుగుదేశంతోనా అని అడిగితే కాస్తా ఓపిక పట్టండి, చంద్రబాబుకు ఉన్నంత ఓపిక కూడా మీకు లేదా అని ఆయన అన్నారు. రాష్ట్రంలో పొత్తుల పెట్టుకునే విషయంలో తమకేమీ అయోమయం లేదని ఆయన చెప్పారు. చంద్రబాబుతో తాజా రాజకీయ పరిణామాలపై తాము చర్చించినట్లు ఆయన తెలిపారు. దేశం చాలా క్లిష్ట సమస్యలను ఎదుర్కొంటోందని, వాటిపై కలిసి పనిచేయాల్సిన అవసరం ఉందని గుర్తించామని ఆయన చెప్పారు. ఈ రోజు రేపు తమ పార్టీ రాష్ట్ర కార్యవర్గ సమావేశంలో పొత్తులపై చర్చిస్తామని, ఆ తర్వాత నవంబర్ 1, 2 తేదీల్లో జరిగే పార్టీ జాతీయ కార్యవర్గ సమావేశాల్లో నిర్ణయం తీసుకుంటామని ఆయన చెప్పారు. ప్రజారాజ్యం అధినేత చిరంజీవితో భేటీలో చర్చకు వచ్చిన విషయాలపై మాట్లాడడానికి ఆయన నిరాకరించారు.

తాము మొదటి నుంచి వామపక్షాలతో కలిసి పనిచేస్తున్నామని తెలుగుదేశం పార్టీ అధ్యక్షుడు నారా చంద్రబాబునాయుడు చెప్పారు. వామపక్షాలతో తాము ఇప్పటికే కలిసి పనిచేస్తున్నామని ఆయన మీడియా ప్రతినిధులతో చెప్పారు. పొత్తుల విషయంపై మాట్లాడడానికి ఆయన నిరాకరించారు. భారతీయ జనతా పార్టీ (బిజెపి) మతవిధానాలను తాము వ్యతిరేకిస్తున్న విషయాన్ని ఆయన గుర్తు చేశారు. చంద్రబాబు తాము పాత మిత్రుడని, జాతీయ రాజకీయాల్లో చంద్రబాబుది కీలకమైన పాత్ర అని బర్దన్ అన్నారు. చిరంజీవి, చంద్రబాబుల్లో మీకు దగ్గరి మిత్రుడెవరని విలేకరులు అడిగితే తనకు అత్యంత సన్నిహిత మిత్రురాలు తన భార్య బర్దన్ జవాబిచ్చారు.

తెలుగుదేశం పార్టీ అధ్యక్షుడు నారా చంద్రబాబు నాయుడు తన నివాసంలో బుధవారం ఉదయం సిపిఐ అగ్రనేతలతో సమావేశమయ్యారు. సిపిఐ నేతలను ఆయన అల్పాహార విందుకు హాజరయ్యారు. సిపిఐ రాష్ట్ర కార్యవర్గ సమావేశాల్లో పాల్గొనడానికి హైదరాబాదు వచ్చిన సిపిఐ ప్రధాన కార్యదర్శి ఎబి బర్ధన్ తో పాటు రాజా, సురవరం సుధాకర్ రెడ్డి, పువ్వాడ నాగేశ్వరరావు చంద్రబాబు ఇంటికి వచ్చారు. రాష్ట్రంలో పెట్టుకోవాల్సిన పొత్తులపై చర్చించడానికి సిపిఐ రాష్ట్ర కార్యవర్గం సమావేశమవుతోంది.

చంద్రబాబు నివాసానికి సిపిఐ రాష్ట్ర కార్యదర్శి కె. నారాయణ మాత్రం రాలేదు. ఆయన గైర్హాజరీపై అనేక అనుమానాలు తలెత్తుతున్నాయి. ప్రజారాజ్యంతో పొత్తు పెట్టుకోవడానికి నారాయణ ఎక్కువ ప్రాధాన్యం ఇస్తున్నారనే వార్తలు వస్తున్న విషయం తెలిసిందే. అయితే అనారోగ్యం కారణంగా నారాయణ చంద్రబాబు నివాసానికి రాలేకపోయారని సిపిఐ నాయకులు చెప్పారు .