ఆ రెండు తప్ప ఏవైనా సరే: దత్తాత్రేయ

కరీంనగర్‌: వచ్చే ఎన్నికల్లో కాంగ్రెస్‌, వామపక్షాల మినహా ఏ పార్టీలతోనైనా తాము పొత్తుకు సిద్ధంగా ఉన్నామని భాజపా రాష్ట్ర అధ్యక్షుడు బండారు దత్తాత్రేయ అన్నారు. భావసారూప్యం కలిగిన పార్టీలతోనే పొత్తు పెట్టుకుంటామని ఆయన సోమవారం మీడియా ప్రతినిధుల సమావేశంలో అన్నారు. మరో మూడు నెలల్లో పార్లమెంట్‌కు ఎన్నికలు వస్తాయని భాజపా అధికారంలోకి రావటం ఖాయమని ఆయన అన్నారు. ఆ తరువాత ఆరునెలల్లో తెలంగాణా వస్తుందన్నారు.

కాంగ్రెస్‌ తెలంగాణా ఇస్తుందన్న భ్రమనుంచి తెలంగాణ రాష్ట్ర సమితి (తెరాస) అధ్యక్షుడు కేసీఆర్‌ బయటకు రావాలని సూచించారు. తన వల్లనే రాజకీయ పార్టీలు తెలంగాణకు అనుకూలంగా నిర్ణయం తీసుకుంటున్నాయనే కెసిఆర్ మాటలను ఆయన కొట్టిపారేశారు. అలా చెప్పుకోవడం కెసిఆర్ కు మంచిది కాదని ఆయన అన్నారు.