వైయస్ మళ్లీ సిఎం కావాలి: మోహన్ బాబు

హైదరాబాద్: వచ్చే ఎన్నికల్లో కాంగ్రెసును గెలిపించాలని ప్రముఖ సినీ నటుడు మోహన్ బాబు పిలుపునిచ్చారు. నంది అవార్డుల ప్రదానోత్సవ కార్యక్రమంలో చేసిన ప్రసంగంలో ఆదివారం సాయంత్రం ఆయన ఈ పిలుపునిచ్చారు. కాంగ్రెసు ఎన్నో మంచి పనులు చేసిందని ఆయన కొనియాడారు. సీని రంగానికి కాంగ్రెసు మాత్రమే మేలు చేసిందని ఆయన అన్నారు. చిన్న సినిమాలను బతికించేందుకు ముఖ్యమంత్రి డాక్టర్ వైయస్ రాజశేఖర రెడ్డి ఏది అడిగితే అది చేశారని ఆయన చెప్పారు. మళ్లీ మళ్లీ రాజశేఖర రెడ్డే ముఖ్యమంత్రి కావాలని కోరుకుంటున్నట్లు ఆయన తెలిపారు. తాను విపరీతంగా అభిమానించే అన్నయ్య (ఎన్టీఆర్) జాతీయ అవార్డు ఎంపిక కమిటీలో తాను ఉండడం తన అదృష్టంగా భావిస్తున్నట్లు ఆయన తెలిపారు.

తన అభిమాన రాజకీయ హీరో వైయస్ రాజశేఖర రెడ్డి అని సూపర్ స్టార్ కృష్ణ కొనియాడారు. వైయస్ రాజశేఖర రెడ్డే మళ్లీ ముఖ్యమంత్రి కావాలని కోరుకుంటున్నట్లు ఆయన తెలిపారు. నంది అవార్డుల ప్రదానోత్సవ కార్యక్రమంలో ఆయన ప్రసంగించారు. వైయస్ రాజశేఖ రెడ్డి ప్రభుత్వం చేపట్టిన జలయజ్ఞం కార్యక్రమాన్ని ఆయన ప్రశంసించారు. వైయస్ రాజశేఖర రెడ్డి అన్ని కార్యక్రమాలు చేపట్టారని, ఇది చేయలేదనే మాట లేకుండా చేశారని ఆయన అన్నారు. ఆరోగ్యశ్రీ పథకాన్ని ఆయన కొనియాడారు.