చిరుకు అధికారం కల్ల: వైయస్

హైదరాబాద్: ప్రజారాజ్యం పార్టీ అధినేత చిరంజీవి అధికారంలోకి వచ్చే పరిస్థితి లేదని, అది అదృష్టమని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. మూడు ప్రాజెక్టులు తప్ప మరే సాగునీటి ప్రాజెక్టులు అవసరం లేదని అనడం చిరంజీవి అవగాహనా రాహిత్యానికి నిదర్శనమని ఆయన అన్నారు. ఒక ప్రైవేట్ టీవీ చానెల్ కార్యక్రమంలో ఆయన ఆ వ్యాఖ్యలు చేశారు.

చిరంజీవికి వ్యవసాయం గురించి తెలియదని, అటువంటి చిరంజీవి అధికారంలోకి వస్తే రాష్ట్రం దశాబ్దాలు వెనక్కి పోతుందని, అయితే చిరంజీవి అధికారంలోకి వచ్చే పరిస్థితులు లేవని ఆయన అన్నారు. ప్రాజెక్టుల నిర్మాణాల్లో అవినీతి జరుగుతోంది కాబట్టి ప్రాజెక్టులే నిర్మించకూడదని చిరంజీవి అనడం సరైంది కాదని, ఎలుక ఉందని గుడిసెను తగులబెట్టుకోలేం కదా, అలాగే అవినీతి ఉందని ప్రాజెక్టులు కట్టకూడదని అనడం సరైంది కాదని, అవినీతి లేకుండా చూసుకోవాల్సి ఉంటుందని ఆయన అన్నారు.