10 తర్వాత బాబుతో బాలయ్య భేటీ

హైదరాబాద్: సినిమా షూటింగ్‌ కోసం విదేశాలకు వెళ్లిన ప్రముఖ సినీ నటుడు బాలకృష్ణ మంగళవారం రాష్ట్రానికి తిరిగి వస్తున్నారు. 10వ తేదీన ఆయన విశ్రాంతి తీసుకుంటారు. బాబ్లీపై పోరాటం అనంతరం ఢిల్లీ నుంచి తెలుగుదేశం పార్టీ అధ్యక్షుడు చంద్రబాబునాయుడు తిరిగి వస్తారు. ఆ తర్వాత చంద్రబాబు బాలయ్యతో భేటీ అవుతారు. డిసెంబరు మూడో వారం నుంచి రాయలసీమలో రోడ్‌షోలు చేపట్టాలని బాలయ్య తొలుత నిర్ణయించుకున్నారు.

అయితే హైకోర్టు రోడ్‌షోలపై స్టే విధించడంతో తన ప్రచార కార్యక్రమాలు ఏవిధంగా ఉండాలనే విషయంపై ఆయన, చంద్రబాబులు చర్చ జరుపుతారని సమాచారం. హరికృష్ణ కూడా ఇందులో పాల్గొంటారు. బహిరంగ సభలు, ఎన్టీఆర్‌ విగ్రహావిష్కరణ సభల రూపంలో ప్రచార కార్యక్రమం రూపొందించాలన్న ఆలోచనతో పార్టీ ఉంది. బాబు, బాలయ్య భేటీలో దీనికి తుదిరూపునివ్వనున్నారు. ఎన్నికలు ఫిబ్రవరిలో జరిగే అవకాశం లేదు. ఏప్రిల్ లోనే జరిగే అవకాశం ఉంది. అందువల్ల బాలయ్య తన ప్రచార కార్యక్రమాన్ని డిసెంబర్ మూడో వారంలో చేపట్టకపోవచ్చు. తన కార్యక్రమాన్ని ఆయన వాయిదా వేసుకునే అవకాశం ఉందని అంటున్నారు.