కాపులంతా పీఆర్ పీ వెనకే: వీహెచ్‌

న్యూఢిల్లీ: ఈసారి కాపులంతా మూకుమ్మడిగా ప్రరాపా వెనకే నిలుస్తారు. మహాకూటమి వల్ల తెలుగుదేశం బలంగా తయారైంది. నిన్నటివరకు కాపులంతా కాంగ్రెస్‌ వెనకే ఉన్నారు. ఇప్పుడు ప్రరాపా రావడం మాకు నష్టం కల్గిస్తుందన్న ఆందోళన ఉంది అని కాంగ్రెస్‌ సీనియర్‌ నేత, రాజ్యసభ సభ్యుడు వి.హనుమంతరావు అభిప్రాయపడ్డారు. మంగళవారం సాయంత్రం సోనియా గాంధీ నివాసం నుంచి బయటికొచ్చిన తర్వాత మీడయాతో మాట్లాడుతూ ఈ విషయాలు చెప్పుకొచ్చారు.

అలాగే తెలంగాణలో సెంటిమెంట్‌ ఉందని, దానికి అభివృద్ధి కూడా కలిస్తే లాభమని మేం చెబుతున్నాం. కానీ ముఖ్యమంత్రి ఆలోచన మాత్రం వేరేగా ఉంది. దీనికి మేమేం చేయగలం. మళ్లీ కేంద్రంలో కాంగ్రెస్‌ ప్రభుత్వం రావాలనేదే మా ఆలోచన. దానికి మా వంతు ప్రయత్నం చేస్తాం. అధిష్ఠానానికి వె.ఎస్‌., డి.ఎస్‌.లు ఎవరివాదన వారు వినిపించారు. వై.ఎస్‌. కూడా తెలంగాణపై మాట్లాడటానికి సమయం లేదన్నారు తప్పితే దానికి తెరపడిందని చెప్పలేదు'' అని అన్నారు.ఇక తెలంగాణపై అధిష్ఠానం సానుకూల నిర్ణయం తీసుకుంటుందని విశ్వాసం వ్యక్తం చేశారు. సోనియా గాంధీ తెలంగాణాపై అవుననో... కాదనో చెప్పేంతవరకూ తమవంతు ప్రయత్నాలు చేస్తూనే ఉంటామని చెప్పారు.