నర్సాపురమే నా చాయిస్: కృష్ణంరాజు

ఏలూరు: నరసాపురం ఎంపీ అభ్యర్థిగా పోటీ చేయాలన్నది తన అభిమతమని, పార్టీ అధిష్ఠానం కోరితే రాజమండ్రి నుంచి పోటీ చేయడానికి సిద్ధంగా ఉన్నానని పీఆర్పీ నేత కృష్ణంరాజు స్పష్టం చేశారు. పశ్చిమగోదావరి జిల్లా ద్వారకాతిరుమల వెంకన్న సన్నిధికి గురువారం ఆయన సతీసమేతంగా వచ్చారు. ప్రత్యేక పూజలు నిర్వహించారు.

ఈ సందర్భంగా కృష్ణంరాజు విలేఖరులతో మాట్లాడుతూ తాను ఎక్కడి నుంచి పోటీ చేసినా నాలుగో తేదీన నామినేషన్‌ వేస్తానని చెప్పారు. కృష్ణంరాజు సతీమణి మాట్లాడుతూ నరసాపురంలో కోట్లాది రూపాయల అభివృద్ధి పనులు చేసినందున అక్కడి నుంచే కృష్ణంరాజు పోటీ చేయాలని నిర్ణయించుకున్నారని అన్నారు.