రాహుల్, పవార్ భవితవ్యం నేడే

న్యూఢిల్లీ: దేశంలోని 12 రాష్ట్రాల్లోని 140 లోకసభ స్థానాల్లో గురువారం పోలింగ్ ప్రారంభమైంది. ఈ నియోజకవర్గాల్లో 2 వేల 41 మంది అభ్యర్థులు పోటీలో ఉన్నారు. రెండు లక్షలకుపైగా కేంద్రాల్లో వోటర్లు తమ ఓటు హక్కును వినియోగించుకుంటున్నారు. రాహుల్ గాంధీ, శరద్ పవార్, జార్జి ఫెర్నాండెజ్, రాం విలాస్ పాశ్వాన్, సుష్మా స్వరాజ్ వంటి నేతల భవితవ్యాన్ని ఓటర్లు గురువారం తేల్చనున్నారు. గురువారంనాడు ఆంధ్రప్రదేశ్, ఒరిస్సా శాసనసభా స్థానాలకు కూడా పోలింగ్ ముగుస్తుంది. రాహుల్ గాంధీ అమేథీ నుంచి తిరిగి పోటీ చేస్తుండగా, శరద్ పవార్ కొత్తగా ఏర్పాటైన మాధా నుంచి. ఫెర్నాండెజ్ ముజఫర్ నగర్ నుంచి పోటీ చేస్తున్నారు.

రెండో దశ పోలింగ్ జరుగుతున్న నియోజకవర్గాల్లో 121 మంది మహిళలు పోటీలో ఉన్నారు. ఆంధ్రప్రదేశ్ లో 20, అస్సాంలో 11, బీహార్ లో 13, గోవాలో 2, జమ్మూ కాశ్మీర్ లో 1, కర్ణాటకలో 17, మధ్యప్రదేశ్ 13, మహారాష్ట్రలో 25, ఒరిస్సాలో 11, త్రిపురలో 2, ఉత్తరప్రదేశ్ లో 17, జార్ఖండ్ లో 8 లోకసభ స్థానాలకు గురువారం పోలింగ్ జరుగుతోంది.