పది లక్షల కోట్లు దాటిన బడ్జెట్

న్యూఢిల్లీ: ఆర్థిక మంత్రి ప్రణబ్ ముఖర్జీ ప్రతిపాదించిన బడ్జెట్ పది లక్షల కోట్ల రూపాయలు దాటింది. భారత ప్రభుత్వ బడ్జెట్ పది లక్షల కోట్లు దాటడం ఇదే తొలిసారి. రు. 10,20,838 కోట్లతో ప్రణబ్ ముఖర్జీ సోమవారం పార్లమెంటులో బడ్జెట్ ను ప్రతిపాదించారు. ప్రణాళికా వ్యయానికి 3,25,149 కోట్ల రూపాయలు కేటాయించగా ప్రణాళికేతర వ్యయానికి 6,95,690 కోట్ల రూపాయలు కేటాయించారు. రాయితీలకు ప్రణబ్ ముఖర్జీ పెద్ద పీట వేశారు. రాయితీల వ్యయం లక్ష కోట్ల రూపాయలు దాటింది. బడ్జెట్ పెరుగుదల శాతం 36 ఉంది. ప్రణాళికా వ్యయం 34 శాతం పెరిగింది.

రక్షణ రంగానికి ప్రణబ్ ముఖర్జీ తన బడ్జెట్ లో కేటాయింపులు గణనీయంగా పెంచారు. రక్షణ రంగానికి 1,41,700 కోట్ల రూపాయలు కేటాయించారు. పారా మిలటరీ సిబ్బందికి లక్ష ఇళ్లు నిర్మించి ఇవ్వనున్నట్లు తెలిపారు. మౌలిక సదుపాయాల కల్పనకు కూడా ఆయన ప్రాధాన్యం ఇచ్చారు.