అసెంబ్లీ: వైయస్ బాబుల ఢీ

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డి, ప్రతిపక్ష నాయకుడు నారా చంద్రబాబు నాయుడు సవాళ్లు, ప్రతిసవాళ్ల మధ్య సోమవారం శాసనసభ సమావేశాలు వేడెక్కాయి. చంద్రబాబు విశ్వసనీయతపై, తన విశ్వసనీయతపై రాష్ట్రంలో రెఫరెండం పెట్టడానికి తాను సిద్ధమని, అందుకు చంద్రబాబు సిద్ధపడతారా అని ముఖ్యమంత్రి సభలో అన్నారు. దానికి చంద్రబాబు ప్రతిస్పందిస్తూ - కేవలం విశ్వసనీయత మీదనే కాకుండా తమ ఇద్దరి అవినీతి, పాలన, హత్యారాజకీయాలను కూడా రెఫరెండం అంశాల్లో చేర్చాలని అన్నారు. అందుకు ముఖ్యమంత్రి సిద్ధపడుతూ - ఈ రెఫరెండంలో ఎవరం ఓడిపోతే వారు రాజకీయాల నుంచి తప్పుకోవాలని అన్నారు. అందుకు చంద్రబాబు సిద్ధపడ్డారు.

అనంతరం స్పీకర్ కిరణ్ కుమార్ రెడ్డి వివిధ పార్టీల అభిప్రాయాలను తీసుకున్నారు. ప్రజారాజ్యం, లోకసత్తా, సిపిఐ, సిపిఎంలు ఇద్దరు నేతల సవాళ్లను, ప్రతిసవాళ్లను వ్యతిరేకించారు. వ్యక్తిగత విషయాలపై సభా సమయం వృధా చేయవద్దని వారు సలహా ఇచ్చారు. అనంతరం సభను స్పీకర్ రేపటికి వాయిదా వేశారు.