420 ఎవరో తేల్చారు: వైయస్

హైదరాబాద్: రాష్ట్రంలో 420 ఎవరో తేల్చారని ముఖ్యమంత్రి డాక్టర్ వైయస్ రాజశేఖర రెడ్డి ప్రతిపక్ష నాయకుడు నారా చంద్రబాబు నాయుడును ఉద్దేశించి అన్నారు. తెలుగుదేశం పార్టీవన్నీ ట్వంటీ 20 ఆలోచనలే అని ఆయన వ్యాఖ్యానించారు. మెట్రో రైలు ప్రాజెక్టుపై సోమవారం శాసనసభలో జరిగిన చర్చకు ఆయన సమాధానమిస్తూ చంద్రబాబుపై తీవ్ర వ్యాఖ్యలు చేశారు. మెట్రో రైలు ప్రాజెక్టు విషయంలో తాము లాలూచీ పడి ఉంటే ప్రజలు తమకు ఓటేసి ఉండేవారు కారని ఆయన అన్నారు. తెలుగుదేశం ప్రభుత్వం హయాంలో చంద్రబాబు బల్లీరావుకు వేయి ఎకరాల కేటాయింపులో లాలూచీ పడ్డారని ఆయన ఆరోపించారు.

మెట్రో ప్రాజెక్టు టెండర్ల పరిశీలనలో అవకతవకలు జరగలేదని, ప్రభుత్వానికి 30 కోట్ల రూపాయలకు పైగా చెల్లించిన వారికే కాంట్రాక్టు ఇచ్చామని, ఈ సమయంలో చంద్రబాబు అధికారంలో ఉంటే కమిషన్ ఇచ్చేవారికే ఆ ప్రాజెక్టు ఇచ్చి ఉండేవారని ఆయన అన్నారు. హైదరాబాదుకు తాము ఎంతో చేశామని ఆయన చెప్పారు. 150 అడుగుల ఔటర్ రింగ్ రోడ్డును 150 మీటర్లతో నిర్మిస్తున్నామని, గత ఐదేళ్లలో 30 పార్కులు నిర్మించామని ఆయన చెప్పారు.