అమెరికాలో ఆంధ్ర విద్యార్థి మృతి

వాషింగ్టన్: అమెరికాలో జరిగిన ఓ కారు ప్రమాదంలో హైదరాబాదుకు చెందిన 22 ఏళ్ల విద్యార్థి మృతి చెందాడు. ఓహ్యాలోని డేటోన్ 22 రూటులో తన ఇంటి నుంచి కారులో తన మిత్రుడు వరణ్ తో కలిసి విశ్వవిద్యాలయానికి వెళ్తుండగా కారు ప్రమాదానికి గురైంది. మరణించిన విద్యార్థి నరేష్ దాచా రైట్ స్టేట్ యూనివర్శిటీలో ఎంఎస్ (ఇఇ) మొదటి సంవత్సరం చదువుతున్నాడు.

నిన్న ఉదయం ఐదున్నర గంటలో ప్రాంతంలో పిల్లిని రక్షించే ప్రయత్నంలో నరేష్ తన కారును చెట్టుకు ఢీకొట్టినట్లు తానా అధ్యక్షుడిగా ఎన్నికైన ప్రసాద్ తోటకూర చెప్పారు. ఈ విషయాన్ని తాము అతని తల్లిదండ్రులకు తెలిపామని, మృతదేహాన్ని హైదరాబాదుకు పంపడానికి ఏర్పాట్లు చేస్తున్నామని ఆయన చెప్పారు.

నరేష్ నల్లగొండ జిల్లాలోని భువనగిరిలో గల అరోరా ఇంజినీరింగ్ కళాశాలలో నరేష్ బిటెక్ పూర్తి చేశాడు. ఈ ఏడాది జనవరిలో రైట్ స్టేట్ యూనివర్శిటీలో చేరాడు. నరేష్ తల్లిదండ్రులు, సోదరుడు హైదరాబాదులో ఉంటున్నారు.