భయాలు అక్కర్లేదు: సబిత

హైదరాబాద్: గణేష్ నిమజ్జనం సందర్భంగా ప్రజలు భయపడాల్సిన అవసరం లేదని రాష్ట్ర హోం మంత్రి సబితా ఇంద్రారెడ్డి అన్నారు. ప్రజల భద్రతకు పూర్తి భరోసా ఇస్తున్నట్లు ఆమె తెలిపారు. గురువారం జరిగే గణేష్ నిమజ్జనోత్సం సందర్భంగా చేసే భద్రతా ఏర్పాట్లపై ఆమె బుధవారం సమీక్షించారు. గణేష్ నిమజ్జనం సందర్భంగా ఉగ్రవాద దాడులకు సంబంధించి తమకు నిఘా వర్గాల నుంచి ఏ విధమైన సమాచారం అందలేదని ఆమె చెప్పారు. గణేష్ నిమజ్జనం జరిగే హుస్సేన్ సాగర్ ప్రాంతాన్ని కూడా ఆమె సందర్శించారు.

అవాంఛనీయ సంఘటనలు జరగకుండా 26 వేల మంది అదనపు పోలీసులను నియోగిస్తున్నట్లు ఆమె చెప్పారు. 40 బాంబ్ స్క్వాడ్ బృందాలను ఏర్పాటు చేసినట్లు ఆమె తెలిపారు. హైదరాబాదులో 257 సున్నిత ప్రాంతాలను, 536 సమస్యాత్మక ప్రాంతాలను గుర్తించినట్లు చెప్పారు. నిమజ్జనం కోసం 32 క్రేన్లు ఏర్పాటు చేసినట్లు చెప్పారు. ఇప్పటికే జంటనగరాల్లోని నాలుగు వేల విగ్రహాల నిమజ్జనం జరిగిందని అన్నారు. గురువారంనాడు ఆరు నుంచి 7 వేల విగ్రహాల నిమజ్జనం జరుగుతుందని సబితా ఇంద్రారెడ్డి చెప్పారు. ముందు జాగ్రత చర్యగా 800 మంది రౌడీ షీటర్లను అదుపులోకి తీసుకున్నట్లు ఆమె తెలిపారు.