కర్నూలుకు వైయస్ భౌతిక కాయం

కర్నూలు: ముఖ్యమంత్రి డాక్టర్ వైయస్ రాజశేఖర రెడ్డి భౌతిక కాయం గురువారం మధ్యాహ్నం కర్నూలుకు చేరుకుంది. భారత వైమానిక దళానికి చెందిన హెలికాప్టర్ లో ఆయన భౌతిక కాయాన్ని కర్నూలు బేస్ క్యాంపునకు తరలిస్తున్నారు. మరో ఇద్దరి మృతదేహాలకు కూడా అదే హెలికాప్టర్ లో వచ్చాయి. మృత దేహాలకు హెలికాప్టర్ లోనే పోస్టు మార్టం నిర్వహించారు. అక్కడి నుంచి వైయస్ భౌతిక కాయాన్ని హైదరాబాదుకు తరలిస్తారు. రేపు (శుక్రవారం) ఉదయం పది గంటలకు ప్రజల సందర్శనార్థం హైదరాబాదులోని ఎల్బీ స్టేడియంలో ఉంచుతారు.

శుక్రవారం మధ్యాహ్నం ఒంటి గంటకు భౌతిక కాయాన్ని ఆయన స్వస్థలం పులివెందులకు తరలిస్తారు. పులివెందులలోనే ఆయన అంత్య క్రియలు జరుగుతాయి. వైయస్ మృతికి సంతాప సూచకంగా గురువారం, శుక్రవారం ప్రభుత్వం రాష్ట్రంలో సెలవు ప్రకటించింది. వారం రోజుల పాటు సంతాపదినాలుగా ప్రకటించింది. వైయస్ మరణ వార్త వినగానే రాష్ట్రం యావత్తు శోకసంద్రంలో మునిగిపోయింది.