'సత్యం' రాజు సలహా ఉత్తదే: కొసరాజు

హైదరాబాద్: స్టాక్ మార్కెట్లో పెట్టుబడులపై తనకు సత్యం కంప్యూటర్స్ మాజీ చీఫ్ రామలింగరాజు సలహాలు ఇచ్చినట్లు వచ్చిన వార్తలను కృషి బ్యాంక్ చైర్మన్ కొసరాజు వెంకటేశ్వర రావు ఖండించారు. బెయిల్ పై విడుదులైన తర్వాత ఆయన శుక్రవారం మీడియా ప్రతినిధులతో మాట్లాడారు. రామలింగరాజు తనతో పాటు మరో కేసులో నిందితుడు మాత్రమేనని ఆయన అన్నారు. తన ప్రాణాలకు ముప్పు ఉన్నందననే తాను బ్యాంకాక్ కు పారిపోయినట్లు ఆయన తెలిపారు. తన ఆస్తులన్నీ అమ్మి అయినా సరే ఖాతాదారులకు సొమ్ము చెల్లిస్తానని ఆయన చెప్పారు.

తాను ఎవరినీ మోసం చేయలేదని, రిజర్వ్ బ్యాంక్ నిబంధనలను కూడా ఉల్లంఘించలేదని ఆయన అన్నారు. తాను ఖాతాదారులకు 22 కోట్ల రూపాయలు చెల్లించానని, మిగతా సొమ్ము చెల్లిస్తానని ఆయన చెప్పారు. థాయ్ లాండ్ లో తనకు ఏ విధమైన ఆస్తులూ లేవని ఆయన స్పష్టం చేశారు. తాను ఏ విధమైన అక్రమాలకు పాల్పడలేదని ఆయన అన్నారు. అన్ని విషయాలను తాను తర్వాత మీడియాకు వెల్లడిస్తానని ఆయన చెప్పారు. తనకు ఇప్పటికే బెదిరింపు కాల్స్ వస్తున్నాయని, తన ప్రాణాలకు ముప్పు ఉందని ఆయన అన్నారు.