రాహుల్ రైలు: నలుగురి రాళ్లు

న్యూఢిల్లీ: ఎఐసిసి ప్రధాన కార్యదర్శి రాహుల్ గాంధీ ప్రయాణిస్తున్న స్వర్ణ్ శతాబ్ది రైలుపైకి నలుగురు యువకులు రాళ్లు రువ్వుతుండగా రైలు గార్జు చూశాడు. రైలు మెల్లగా వెళ్తున్న సమయంలో కోచ్ లపైకి ముగ్గురు లేదా నలుగురు యువకులు రాళ్లు రువ్వుతున్న దృశ్యాన్ని తాను చూసినట్లు గార్డు చెప్పాడని రోహతక్ రేంజ్ ఐజిపి వి కామరాజ్ చెప్పారు. రాహుల్ ప్రయాణిస్తున్న రైలుపై రాళ్లు రువ్విన సంఘటనపై దర్యాప్తు ప్రారంభించిన విషయం తెలిసిందే.

రాళ్లు రువ్వుతున్నవారిపైకి గార్డు అరిచాడని, అప్పటికే కొన్ని కోచ్ ల అద్దాలు పగిలాయని కామరాజ్ చెప్పారు. అయితే ఆ అల్లరి మూకల ముఖాలను చీకటి కారణంగా గార్డు సరిగా చూడలేకపోయాడని ఆయన అన్నారు. పగిలిన అద్దాలను, రాళ్లను ఫొరెన్సిక్ పరీక్షలకు పంపినట్లు ఆయన తెలిపారు. ఈ సంఘటనపై కేసు నమోదు చేసినట్లు ఆయన తెలిపారు. రాళ్లు రువ్విన వ్యక్తుల గురించి తానేమీ చెప్పలేనని, కారణాలు కూడా చెప్పలేనని, శాస్త్రీయ పద్ధతిలో కేసును అన్ని కోణాల నుంచి విశ్లేషిస్తున్నామని ఆయన చెప్పారు. ఇదిలా ఉంటే, రాహుల్ భద్రతపై ఇంటలిజెన్స్ వర్గాలు హెచ్చరికలు జారీ చేసినట్లు తెలుస్తోంది.