గోడుమంటున్న వరద బాధితులు

కర్నూలు: రాష్ట్రంలోని వరద బాధితులు సహాయం అందక విలవిలలాడుతున్నారు. కర్నూలు జిల్లా వరద బాధితుల పరిస్థితి మరింత దారుణంగా ఉంది. వరద బాధితులు శుక్రవారంనాడు జిల్లా కలెక్టర్ కార్యాలయం ముందు ధర్నాకు దిగారు. తమకు సహాయం అందడం లేదని బాధితులు కర్నూలు కలెక్టర్ కార్యాలయాన్ని ముట్టడించారు. కర్నూలు నగరం పూర్తిగా జలదిగ్బంధంలో చిక్కుకుంది. తమ వారి జాడ తెలియడం లేదంటూ వారు గగ్గోలు పెడుతున్నారు.

కర్నూలు పట్టణంలో ఆరడుగుల మేర నీరు నిలిచింది. పలు కాలనీలు నీట మునిగాయి. వరద ఉధృతి అంతకంతకూ పెరుగుతోంది. కాగా, సహాయం కోసం వచ్చిన హెలికాప్టర్లు సాయంత్రం వరకు కూడా రంగంలోకి దిగలేదు. ఇంధనం లేదంటూ వాటిని ఉపయోగించడానికి నిరాకరిస్తున్నారు. హైదరాబాద్ నుంచి ఇంధనం తెప్పించేందుకు ఏర్పాట్లు చేస్తున్నారు. ముఖ్యమంత్రి ఆదేశం మేరకు జిల్లా ఇంచార్జీ మంత్రి మాణిక్య వరప్రసాద్ ఇక్కడికి చేరుకుంటున్నారు.