తగ్గుతున్న శ్రీశైలం నీటి మట్టం

కర్నూలు: కర్నూలు, మహబూబ్ నగర్ జిల్లాల గుండెల్లో వరద రైళ్లు పరిగెత్తించిన శ్రీశైలం జలాశయంలో నీటి మట్టం క్రమంగా తగ్గుతోంది. సోమవారం ఉదయం 891.60 అడుగుల ఎత్తులో నీరు ప్రవహిస్తోంది. జలాశయం ఇన్ ఫ్లో 7.51 లక్షల క్యూసెక్కులు ఉండగా ఔట్ ఫ్లో 13.74 లక్షల క్యూసెక్కులు ఉంది. దీంతో కర్నూలు, మహబూబ్ నగర్ జిల్లాలకు వరద ముప్పు తగ్గు ముఖం పట్టింది. కర్నూలు, మహబూబ్ నగర్ జిల్లాల్లో వరద క్రమంగా తగ్గాయి. అయితే ఈ జిల్లాల్లో పరిస్థితి భీతావహంగా ఉంది. స్మశాన ప్రశాంతత నెలకొని ఉంది. కర్నూలు జిల్లాలోని పలు వంతెనలను యుద్ధప్రాతిపదికపై పునరుద్ధరిస్తున్నారు.

నాగార్జున సాగర్ నీటి మట్టం ప్రస్తుతం 587.50 అడుగులు ఉంది. ఇన్ ఫ్లో 11 లక్షల 36 వేల క్యూసెక్కులు ఉంది. అవుట్ ఫ్లో 10 లక్షల క్యూసెక్కులు ఉంది. ప్రకాశం బరాజ్ వద్ద ఇన్ ఫ్లో 9.80 లక్షలు ఉంది. ఇది పది లక్షల క్యూసెక్కులకు పెరిగే అవకాశం ఉంది. విజయవాడ నగరానికి మంచి నీటి ప్రమాదం రాకుండా పంపులతో నీటిని తోడేస్తున్నారు. అవుట్ ఫ్లో 9.52 లక్షల క్యూసెక్కులు ఉంది. ప్రకాశం బరాజ్ కు ముప్పు లేదని అధికారులు అంటున్నారు. నీటి సరఫరాపై అధికారులు విజయవాడ ప్రజలను అప్రమత్తం చేశారు.