జగన్ వల్ల సోనియా అందరికీ దూరం

హైదరాబాద్: రాష్ట్రంలోని వరద తాకిడి జిల్లాలో కాంగ్రెసు అధ్యక్షురాలు సోనియా గాంధీ పర్యటన హడావిడి లేకుండా జరిగిపోయింది. ఆమె పర్యటన సందర్భంగా మంత్రులు, కాంగ్రెసు నేతలు ఎవరు కూడా సందడి చేయలేదు. హైదరాబాదులోని శంషాబాద్ విమానాశ్రయానికి మంత్రులను గానీ, పార్టీ నేతలను గానీ అహ్వానించలేదు. సాధారణంగా ముఖ్యమంత్రితో పాటు రెవెన్యూ మంత్రి ఇటువంటి సందర్భాల్లో ఉండడం ఆనవాయితీ. అయితే ముఖ్యమంత్రి రోశయ్య, పిసిసి అధ్యక్షుడు డి. శ్రీనివాస్ తప్ప సోనియా వెంట రాష్ట్రానికి చెందినవారెవరూ లేరు. విమానాశ్రయంలో కూడా ఇతరులెవరూ లేకపోవడం గమనార్హం. మంత్రులు గానీ, పార్టీ నాయకులు గానీ విమానాశ్రయానికి రావద్దని కచ్చితంగా ఆదేశాలు వల్లనే ఈ పరిస్థితి నెలకొన్నట్లు చెబుతున్నారు.

మంత్రులను, పార్టీ నాయకులను అనుమతిస్తే వైయస్ జగన్ వ్యవహారం ముందుకు రావచ్చునని, రాష్ట్రం వరదలతో కొట్టుమిట్టాడుతుంటే అటువంటి పరిస్థితి ఎదురైతే ఇబ్బందిగా ఉంటుందని భావించి ముందు జాగ్రత్త చర్యగానే ఎవరూ రావద్దని ఆదేశించినట్లు చెబుతున్నారు. మంత్రులు కూడా తనను కలవకుండా ఆమె జాగ్రత్త పడినట్లు చెబుతున్నారు. రోశయ్యకు తాము పూర్తి మద్దతు ప్రకటిస్తామని, ముఖ్యమంత్రి ఎవరైనా రాష్ట్రానికి సహాయం అందించడంలో ముందుంటామని సంకేతాలు ఇవ్వడానికి సోనియా రాష్ట్ర పర్యటనకు వచ్చినట్లు చెబుతున్నారు. ప్రధాని మన్మోహన్ సింగ్ కూడా అందులో భాగంగానే రాష్ట్ర పర్యటనకు వస్తారని అంటున్నారు. ఏమైనా జగన్ వ్యవహారం గురించి వినడానికి సోనియా ఇష్టంగా లేరని అంటున్నారు.