పావురాల గుట్టకు సురేఖ, 'వైఎస్ కు లేఖ'

హైదరాబాద్: దివంగత ముఖ్యమంత్రి వైఎస్‌ రాజశేఖరరెడ్డి ఆత్మశాంతి కోసం కొండా సురేఖ తన రాజీనామా లేఖ ప్రతిని పావురాలగుట్టకు వెళ్లి సమర్పించాలని నిర్ణయం తీసుకున్నట్లు ఆమె భర్త, ఎమ్మెల్సీ మురళీధరరావు తెలిపారు. వైఎస్‌ మృతి చెంది రెండు నెలలు పూర్తయిన సందర్భాన్ని పురస్కరించుకుని నవంబరు రెండో తేదీన కార్యక్రమాన్ని నిర్వహిస్తున్నట్లు చెప్పారు.

శనివారం సాయంత్రం వరంగల్‌లో ఆయన కార్యకర్తలతో సమావేశం నిర్వహించారు. ఇందులో మురళీధరరావు మాట్లాడుతూ వైఎస్‌ సహాయంతో రాజకీయాల్లో నిలదొక్కుకుని పదవులు పొందిన వారు పైకి మాత్రమే రాజీనామా చేస్తామని చెప్పారన్నారు. ఆయన మృతి తర్వాత వెంటనే రాజీనామా చేస్తామని చెబుతూ వచ్చిన మంత్రులు ఇప్పుడు మాట మార్చారన్నారు.