'కెసిఆర్ చప్పుళ్ళకు సెటిలర్లు భయపడరు'

హైదరాబాద్‌: టీఆర్‌ఎస్‌ అధినేత కెసిఆర్ తలపెట్టనున్న ఆమరణ దీక్షకు హైదరాబాద్‌ లోని సెటిలర్లు భయపడటం లేదని గుంటూరు కాంగ్రెస్ ఎంపీ రాయపాటి సాంబశివరావు అన్నారు. మరో ప్రశ్నకు సమాధానమిస్తూ హైదరాబాద్‌లో సెటిలర్లు చాలా బలంగా వున్నారన్నారు. రాయపాటి సాంబశివరావు మొదటి నుంచి తెలంగాణ రాష్ట్రం ఏర్పాటుకు వ్యతిరేకంగా, సమైక్యాంధ్రకు అనుకూలంగా వ్యవహరిస్తున్న విషయం తెలిసిందే. ఆయన ఈ విషయంలో అనేకసార్లు సోనియాగాంధీని కలుసుకుని తన వాదనను విన్పించారు.

రాష్ట్రానికి నిధులను తీసుకురావడంలో ఎంపీలు విఫలమయ్యారని ఆయన మీడియాతో అన్నారు. అంతేకాక రైల్వే బడ్జెట్‌లో రాష్ట్రానికి అన్యాయం జరిగిందన్నారు. కేంద్రంలో ఓ కేబినెట్ మంత్రి పదవిని తప్ప ఏమి సాధించుకోలేదన్నారు. స్వతహాగా వ్యాపార వేత్త అయిన రాయపాటి సాంబశివరావు మొదట వైఎస్ మద్దతుదారుడైనా ఇప్పుడు రోశయ్యకు అనుకూలంగా వ్యవహరిస్తున్నారు.