కెసీఆర్ వినకపోతే తగిన చర్యలు: సిఎం రోశయ్య

విశాఖపట్నం: తెలంగాణ రాష్ట్ర సమితి అధ్యక్షుడు కేసీఆర్‌ ఆమరణ దీక్షపై ప్రభుత్వం అవసరమైన చర్యలు తీసుకుంటుందని ముఖ్యమంత్రి రోశయ్య బుధవారం మధ్యాహ్నం విలేకరులతో చెప్పారు. దీక్ష నిర్ణయం తీసుకునేముందు శాంతియుతంగా పోరాడాలని కేసీఆర్‌కు చెప్పానని, ఆయన వినలేదని రోశయ్య అన్నారు. కేసీఆర్‌ దీక్షపై ప్రభుత్వ యంత్రాంగం సరైన సమయంలో స్పందిస్తుందని ముఖ్యమంత్రి రోశయ్య చెప్పారు.

ఇలా ఉండగా, ప్రత్యేక తెలంగాణ సాధనకోసం తెరాస అధినేత కె.చంద్రశేఖర్‌రావు చేపట్టే ఆమరణ నిరాహార దీక్షకు ఎన్ని అడ్డంకులు ఎదురైనా ఆగే పరిస్థితి లేదని ఆ పార్టీ శాసనసభా పక్షనేత ఈటెల రాజేందర్‌రెడ్డి తెలిపారు. కేసీఆర్‌ దీక్ష చేసే స్థలంలో బోర్లు వేయడంపై ఈటెల రాజేందర్‌కు రెవెన్యూ అధికారులు నోటీసులు ఇవ్వడంపై ఆయన పై విధంగా స్పందించారు.