తెలంగాణపై వైఖరిలో మార్పు లేదు: చంద్రబాబు నాయుడు

న్యూఢిల్లీ: తెలంగాణపై తమ వైఖరిలో మార్పు లేదని తెలుగుదేశం పార్టీ అధ్యక్షుడు నారా చంద్రబాబు నాయుడు స్పష్టం చేశారు. తెలంగాణపై తమకు స్పష్టత ఉందని ఆయన చెప్పారు. హింసకు తావు లేకుండా ఉద్యమాలు, నిరసన కార్యక్రమాలు నడపాలని ఆయన సూచించారు. ఆందోళనకారులు ప్రభుత్వ, ప్రైవేట్ ఆస్తులను ధ్వంసం చేయడం సరైంది కాదని ఆయన బుధవారం మీడియా ప్రతినిధులతో అన్నారు. ఉద్యమాలు శాంతియుతంగా, సంయమనంతో సాగాలని ఆయన అభిప్రాయపడ్డారు.

మైనింగ్ మాఫియాపై చర్చించేందుకు మరి కొంత మంది జాతీయ నాయకులను కలుస్తానని ఢిల్లీ వచ్చిన ఆయన చెప్పారు. రైతు సమస్యలు రోజురోజుకూ పెరుగుతున్నాయని, ఆత్మహత్యలు ఆగడం లేదని ఆయన అన్నారు. ప్రభుత్వాలు రైతు సమస్యలపై దృష్టి సారించి రైతుల ఆత్మహత్యలను నిరోధించాలని ఆయన డిమాండ్ చేశారు.