అమర్ సింగ్ రాజీనామా ఆమోదించలేదు: ములాయం

లక్నో : సమాజ్‌వాదీ పార్టీ కార్యదర్శి పదవికి అమర్‌సింగ్‌ చేసిన రాజీనామాను ఆమోదించలేదని ఆ పార్టీ అధినేత ములాయంసింగ్‌ యాదవ్‌ స్పష్టం చేశారు. రాజీనామా అంశంపై అమర్‌తో మాట్లాడుతానని ఆయన తెలిపారు. ప్రధాన కార్యదర్శి, పార్టీ అధికార ప్రతినిధి, పార్లమెంటరీ బోర్డు పదవులకు అమర్‌సింగ్‌ రాజీనామా చేసి సాధారణ కార్యకర్తగానే కొనసాగుతానని ప్రకటించిన సంగతి విదితమే.

గతంలో కూడా జయప్రద టికెట్ విషయంలో అమర్ సింగ్ రాజీనామాకు సిద్ధపడ్డారు. చివరికి జయప్రదకు రాంపూర్ టికెట్ రావడంతో ఆయన వెనక్కి తగ్గారు. అమర్ సింగ్ రాజీనామా తర్వాత జయప్రద, జయాబచ్చన్ కూడా రాజీనామాలు చేస్తారన్న ఊహాగానాలు చెలరేగాయి.