అమర్ సింగ్ బాటలో ఎంపీ జయప్రద

న్యూఢిల్లీ: పార్టీ పదవులకు రాజీనామా చేసిన అమర్ సింగ్ బాటలోనే ఉత్తరప్రదేశ్ సమాజ్ వాదీ పార్టీ పార్లమెంటు సభ్యురాలు, సినీ నటి జయప్రద నడిచే అవకాశాలున్నాయి. ఈ సంక్షోభం సమయంలో తాను అమర్ సింగ్ పక్కన నిలబడుతానని ఆమె అన్నారు. పార్టీ నాయకుడు ఆజం ఖాన్ తనపై సమరం ప్రకటించిన సమయంలో తన పక్కన నిలబడిన అమర్ సింగ్ కు తాను మద్దతుగా నిలవడం న్యాయమని ఆమె అంటున్నారు.

ఎస్పీని వదిలిపెట్టాలనే ఆలోచన ఇప్పటి వరకు చేయలేదని, పరిస్థితిలు ప్రతికూలంగా మారితే ఆలోచిస్తానని ఆమె అన్నారు. అమర్ సింగ్ పై రాంగోపాల్ యాదవ్ విమర్శలను ఆమె ఖండించారు. తాను ములాయం సింగ్ ను కలుస్తానని, మధ్యలో ఎవరైనా పరిస్థితిని చెడగొడుతూ ఉండవచ్చునని, విషయాలు ములాయంకు తెలియాల్సిన అవసరం ఉందని ఆమె ఒక ఆంగ్ల దినపత్రిక ప్రతినిధితో అన్నారు. సంజయ్ దత్ పార్టీ పదవులకు రాజీనామా చేశారు. బోజ్ పురి నటుడు మనోజ్ తివారీ కూడా రాజీనామా చేస్తానని ఆయన చెప్పారు. ఎస్పీకి, సినీ రంగానికి మధ్య ఏర్పడిన అగాధాన్ని పూడుస్తానని ఆమె చెప్పారు.