హైదరాబాదులో శాంతిర్యాలీ: మోహన్ బాబు

హైదరాబాద్: హైదరాబాదులో లక్షల మందితో శాంతిర్యాలీ నిర్వహిస్తానని సినీ నటుడు మోహన్ బాబు చెప్పారు. ప్రతి ఇంటి నుంచి ఒక్కరు ఈ శాంతిర్యాలీకి వస్తారని ఆయన గురువారం మీడియా ప్రతినిధులతో అన్నారు. తన సలీం సినిమా ఆగిపోతే ఎవరూ మాట్లాడలేదని, నిర్మాతల మండలిగానీ దర్సుకులు గానీ సాంకేతిక నిపుణులు గానీ మాట్లాడలేదని, తనకు సలీం సినిమా వల్ల ఎంతో నష్టం వచ్చిందని ఆయన అన్నారు. తెలుగు సినీ పరిశ్రమలోని గోడ మీది పిల్లుల గురించి తాను త్వరలోనే బయట పెడతానని ఆయన అన్నారు. తనకు డబ్బులు దండుకోవాల్సిన అవసరం లేదని, డబ్బులు దండుకుంది ఎవరో కూడా తాను బయటపెడతానని ఆయన చెప్పారు.

తెలంగాణ ఎందుకు అడుగుతున్నారని తాను ఏ రోజు కూడా ప్రశ్నించలేదని, తాను సమైక్యాంధ్ర నినాదాన్ని ఈ రోజు కొత్తగా ఎత్తుకోలేదని, ఎన్నో ఏళ్ల నుంచి అందరం కలిసి ఉండాలని అంటున్నానని ఆయన అన్నారు. తాను తిరుపతి నుంచి వచ్చే సరికి తన పాఠశాలపై దాడి చేశారని ఆయన అన్నారు. ప్రజలు తన వెంట ఉన్నారని, తెలంగాణ ప్రజలు కూడా తన వెంట ఉన్నారని ఆయన అన్నారు. తెలంగాణ ప్రజలు మంచివాళ్లు, అమాయకులని, కొంత మంది దుండగులు అరాచకం సృష్టిస్తున్నారని ఆయన అన్నారు. హైదరాబాదులో ఉన్న కొందరు తన భాషను వక్రీకరించి చెబుతున్నారని ఆయన అన్నారు. ఆ టేపులు తాను బయటపెడతానని ఆయన అన్నారు.