ఒఎంసి తవ్వకాల నిలిపివేతపై స్టే పొడగింపు

న్యూఢిల్లీ: కర్నాటక మంత్రి గాలి జనార్దన్ రెడ్డికి చెందిన ఓబుళాపురం మైనింగ్ కంపెనీ తవ్వకాలను నిలిపేస్తూ ఇచ్చిన స్టేను సుప్రీంకోర్టు గురువారం పొడిగించింది. దీంతో గాలి జనార్దన్ రెడ్డికి చుక్కెదురైనట్లే. ఒఎంసిపై మూడు వారాల్లోగా ప్రభుత్వం సమాధానం ఇవ్వాలని సుప్రీంకోర్టు ఆదేశించింది. ఒఎంసి కేసును విచారించి నాలుగు వారాల్లోగా తీర్పు వెలువరించాలని సుప్రీంకోర్టు రాష్ట్ర హైకోర్టును ఆదేశించింది.

ఒఎంసి వ్యవహారాన్ని హైకోర్టులోనే తేల్చుకోవాలని సుప్రీంకోర్టు ఇంతకు ముందు చెప్పింది. ఒఎంసి తవ్వకాల్లో అక్రమాలు జరిగాయని ఆరోపణలు రావడంతో తవ్వకాలను నిలిపేస్తూ ఆంధ్రప్రదేశ్ ప్రభుత్వం ఉత్తర్వులు జారీ చేసింది. ఈ ఉత్తర్వులను సవాల్ చేస్తూ ఒఎంసి కోర్టును ఆశ్రయించింది.