హైతీ భూకంపానికి లక్షలాది మంది మృతి

పోర్ట్- అవ్- ప్రిన్స్: హైతీ రాజధాని పోర్ట్ - అవ్ - ప్రిన్స్ ను బుధవారం తాకిన భారీ భూకంపం తీవ్ర విధ్వంసం సృష్టించింది. ఈ భూకంపంలో భవనాలు కుప్ప కూలిపోయాయి. లక్షలాది మంది మృత్యువాత పడినట్లు తెలుస్తోంది. బాధితుల రోదనలతో పరిస్థితి హృదయవిదారకంగా ఉంది. పార్లమెంటు భవనం, పాఠశాలలు, ఆస్పత్రులు కూడా కూలిపోయాయి. హైతీ అధ్యక్షుడు రేనే ప్రేవాల్ ఆ విషయం చెప్పారు. రాజధానిలో పరిస్థితి ఊహించ శక్యం కాకుండా ఉందని ఆయన అన్నారు.

వీధుల్లో శవాలు పడి ఉన్నాయి. శిథిలాల కింద ఎంతో మంది జాడ తెలియడం లేదు. ఐక్య రాజ్య సమితి పీస్ కీపింగ్ సైనికులు కూడా ఈ విధ్వంసంలో మరణించారు. పీస్ కీపింగ్ మిషన్ జట్టు సహాయక చర్యలకు దిగింది. చైనా బృందం ఇక్కడికి వస్తోంది. అమెరికా బృందాలు కొద్ది గంటల్లో ఇక్కడికి చేరుకుంటాయని ఐక్యరాజ్య సమితి అధికారి జాన్ హోమ్స్ చెప్పారు. ఫ్రాన్స్, ఐస్ ల్యాండ్, తదితర దేశాల నుంచి కూడా సహాయక బృందాలు వస్తున్నాయి. బ్రెజిల్ పది మిలియన్ అమెరికా డాలర్ల సాయాన్ని ప్రకటించింది. ప్రపంచ బ్యాంక్ వంద మిలియన్ డాలర్ల సహాయ కోసం ప్రయత్నిస్తోంది.