చంద్రబాబుకు దగ్గుబాటి సవాల్

హైదరాబాద్: తాను రాసిన పుస్తకంలో తప్పులుంటే బహిరంగ చర్చకు రావాలని స్వర్గీయ ఎన్టీఆర్ పెద్దల్లుడు, కాంగ్రెసు శాసనసభ్యుడు దగ్గుబాటి వెంకటేశ్వ రావు తన తోడల్లుడు, తెలుగుదేశం పార్టీ అధ్యక్షుడు నారా చంద్రబాబు నాయుడిని సవాల్ చేశారు. దగ్దుబాటి వెంకటేశ్వ రావు రాసిన ది అదర్ సైడ్ ఆఫ్ ట్రుత్ అనే పుస్తకాన్ని ఆయన సతీమణి, కేంద్ర మంత్రి పురంధేశ్వరి స్వర్గీయ ఎన్టీఆర్ 14వ వర్ధంతి సందర్భంగా ఆవిష్కరించారు. ఎన్టీ రామారావు జీవితం చరమాంకంలో జరిగిన సంఘటనలు, 1995లో ఆగస్టు సంక్షోభం, ఎన్టీఆర్ మృతికి దారి తీసిన పరిస్థితులపై దగ్గుబాటి వెంకటేశ్వర రావు ఆ పుస్తకం రాశారు. ఒక చరిత్ర, కొన్ని నిజాలు పేరుతో ఆ పుస్తకం తెలుగులో కూడా వచ్చింది.

ఎన్టీఆర్ జీవితంలో జరిగిన విషయాలు బయటి ప్రపంచానికి తెలియాల్సిన అవసరం ఉందని పురంధేశ్వరి అన్నారు. ఈ ప్రయత్నంలో భాగంగానే ఈ పుస్తకాన్ని విడుదల చేశామని ఆమె అన్నారు. ఎన్టీఆర్ కు భారత రత్న ఇవ్వాలని కేంద్ర ప్రభుత్వంపై ఒత్తిడి తెస్తామని ఆమె చెప్పారు. పుస్తకంలోని అంశాలపై తనతో బహిరంగ చర్చకు రావాలని దగ్గుబాటి వెంకటేశ్వర రావు చంద్రబాబుకు ఒక లేఖ రాశారు.