టిజీ వెంకటేష్ క్షమాపణ చెప్పాలి: హరీష్

హైదరాబాద్: తమ పార్టీ అధ్యక్షుడు కె. చంద్రశేఖర రావుపై అనుచిత వ్యాఖ్యలు చేసిన కాంగ్రెసు రాయలసీమ శాసనసభ్యుడు టిజి వెంకటేష్ క్షమాపణ చెప్పాలని తెలంగాణ రాష్ట్ర సమితి (తెరాస) శాసనసభ్యుడు హరీష్ రావు డిమాండ్ చేశారు. కెసిఆర్ ను నరహంతకుడని, పూలన్ దేవి, వీరప్పన్ కన్నా కిరాతకుడని టిజీ వెంకటేష్ చేసిన వ్యాఖ్యలపై ఆయన మంగళవారం మీడియా ప్రతినిధుల సమావేశంలో తీవ్రంగా మండిపడ్డారు. కెసిఆర్ పై చేసిన వ్యాఖ్యలను టీజి వెంకటేష్ ఉపసంహరించుకోకపోతే తీవ్ర పరిణామాలుంటాయని ఆయన హెచ్చరించారు. టిజి వెంకటేష్ ఎప్పుడు ఏది మాట్లాడతారో కూడా తెలియదని, అర్థం పర్థం లేకుండా మాట్లాడుతారని ఆయన అన్నారు. తెలంగాణ విడిపోతే రాయలసీమకు లక్ష కోట్ల రూపాయల ప్యాకేజీ ఇవ్వాలంటారని, ఇంకా ఏదేదో అంటుంటారని ఆయన అన్నారు.

ఈ నెల 29వ తేదీ లోగా కేంద్రం తెలంగాణపై ప్రకటన చేయకపోతే సివిల్ వార్ తలెత్తే ప్రమాదం ఉందని ఆయన అన్నారు. గడువులోగా ప్రకటన రాకుంటే తమ పార్టీ శాసనసభ్యులు రాజీనామాలను ఆమోదింపజేసుకుని బయటకు వస్తారని ఆయన చెప్పారు. భూకబ్జాదారులు, హైదరాబాదులో పెట్టుబడులు పెట్టిన సీమాంధ్ర నాయకులే తెలంగాణ రాకుండా అడ్డుపడుతున్నారని ఆయన విమర్శించారు. తెలంగాణ సాధించే వరకు తమ ఉద్యమం ఆగదని ఆయన చెప్పారు. కాంగ్రెసు హైకమాండ్ ఢిల్లోలో లేదని, గల్లీలోనే ఉందని ఆయన వ్యాఖ్యానించారు. రాజకీయ నాయకులు ప్రజల పక్షాన ఉంటారో, పదవులు పట్టుకుని వేలాడుతారో వారే తేల్చుకోవాలని ఆయన అన్నారు.