తెలంగాణపై డెడ్ లైన్లు లేవు: ఎంపీ వివేక్

న్యూఢిల్లీ: తెలంగాణపై కేంద్ర ప్రభుత్వానికి గానీ తమ పార్టీ అధిష్టానానికి గానీ ఎటువంటి డెడ్ లైన్లు లేవని కాంగ్రెసు పార్లమెంటు సభ్యుడు వివేక్ అన్నారు. తెలంగాణపై మరో రెండు రోజుల్లో స్పష్టమైన ప్రకటన వస్తుందని ఆయన మంగళవారం ఒక టీవీ చానెల్ ప్రతినిధితో చెప్పారు. రాజీనామాలు చేసే ప్రసక్తి కూడా లేదని ఆయన అన్నారు. కేంద్ర ప్రభుత్వం తెలంగాణ రాష్ట్ర ఏర్పాటుకు కట్టుబడి ఉందని, తెలంగాణ రాష్ట్ర ప్రక్రియ ప్రారంభమైందని ఆయన చెప్పారు.

తెలంగాణ రాష్ట్ర ఏర్పాటుకు బిల్లు ప్రతిపాదిస్తే ఓటేయడానికి తాము ఉండాలని, అందుకే రాజీనామాలు చేయడం లేదని ఆయన చెప్పారు. తాము సోనియా గాంధీకి రాజీనామాలు సమర్పించినప్పుడు మీరు రాజీనామాలు చేస్తే తెలంగాణ బిల్లుపై ఓటేయడానికి ఎవరుంటారని అధిష్టానానికి చెందిన నాయకులు అడిగారని ఆయన చెప్పారు. తాము గత రాత్రి అహ్మద్ పటేల్, వీరప్ప మొయిలీలను కలిశామని, తొందర పడవద్దని వారు చెప్పారని ఆయన వివరించారు. తెలంగాణపై కేంద్ర ప్రభుత్వం ఒక్క అడుగు కూడా వెనక్కి పోలేదని ఆయన స్పష్టం చేశారు.