డిసిఎంపై అనవసర రాద్ధాంతం: జానా

హైదరాబాద్: తనకు డిప్యూటీ ముఖ్యమంత్రి పదవి ఇస్తారంటూ అనవసర రాద్ధాంతం సృష్టించవద్దని మాజీ హోం మంత్రి, కాంగ్రెసు సీనియర్ శాసనసభ్యుడు కె. జానా రెడ్డి అన్నారు. తనకు ఉప ముఖ్యమంత్రి పదవి లభించే అవకాశాలున్నట్లు వచ్చిన వార్తలను ఆయన శుక్రవారం మీడియా ప్రతినిధుల సమావేశంలో ఖండించారు. కాంగ్రెసు ప్రజాప్రతినిధుల రాజీనామాలపై తెలంగాణ జెఎసి సమావేశంలో మాట్లాడుతామని ఆయన చెప్పారు. ఈ ఏడాది 2010లోగా తెలంగాణ రాష్ట్రం ఏర్పడుతుందని ఆయన ధీమా వ్యక్తం చేశారు.

కాంగ్రెసు తెలంగాణ నాయకులు ఎవరు కూడా పదవులకు ఆశపడరని కాంగ్రెసు తెలంగాణ కార్యాచరణ కమిటీ కన్వీనర్ బస్వరాజు సారయ్య స్పష్టం చేశారు. ముఖ్యమంత్రిగా రోశయ్యనే కొనసాగుతారని ఆయన అన్నారు. మంత్రి వర్గ విస్తరణలో తెలంగాణ వారికి పదవులు వచ్చే అవకాశం ఉందని వచ్చిన వార్తలపై ఆయన స్పందించారు. జానారెడ్డి, సారయ్య శుక్రవారం ఉదయం ప్రదేశ్ కాంగ్రెసు కమిటీ అధ్యక్షుడు డి. శ్రీనివాస్ ను కలిశారు.