ఇంకా రాజీనామాలెందుకు: విహెచ్ ప్రశ్న

న్యూఢిల్లీ: తెలంగాణపై కేంద్ర హోం మంత్రి పి. చిదంబరం ప్రకటన చాలా స్పష్టంగా ఉందని, అందువల్ల తెలంగాణ ప్రజాప్రతినిధుల రాజీనామాలు చేయాల్సిన అవసరం లేదని కాగ్రెసు తెలంగాణ సీనియర్ నేత వి.హనుమంతరావు అన్నారు. తెలంగాణ రాష్ట్ర ఏర్పాటు ప్రక్రియపై అపోహలు కూడదని, ప్రక్రియ కొనసాగుతోందని ఆయన శుక్రవారం మీడియా ప్రతినిధులతో అన్నారు. రాజీనామాల వల్ల ప్రయోజనం లేదని, వాటి వల్ల రాష్ట్రపతి పాలన వస్తుంది తప్ప తెలంగాణ రాదని ఆయన అన్నారు.

తమ రాజకీయాల కోసం నాయకులు విద్యార్థులను వాడుకోవద్దని ఆయన కోరారు. సమైక్యవాదులు హైదరాబాదులో సభ పెట్టడం తెలంగాణ ప్రాంతంవారిని రెచ్చగొట్టడమేనని ఆయన అన్నారు. ఈ సభ వల్ల ప్రశాంత వాతావరణం దెబ్బ తింటుందని ఆయన అన్నారు. తెలంగాణ రాష్ట్ర ఏర్పాటు కోసం ప్రజాప్రతినిధులు రాజీనామాలు చేయాల్సిన అవసరం లేదని కాంగ్రెసు తెలంగాణ సీనియర్ నాయకుడు అమోస్ కూడా అన్నారు. తెలంగాణపై చిదంబరం ప్రకటన స్పష్టంగా ఉందని, తెలంగాణ రాష్ట్ర ఏర్పాటు ఖాయమైందని, అందువల్ల రాజీనామాలు అవసరం లేదని, డెడ్ లైన్లతో కూడా పని లేదని ఆయన అన్నారు.