పోలీసుల అదుపులో నలుగురు అనుమానితులు

విజయవాడ: బిసీ నాయకుడు పలగాని ప్రభాకర్ కూతురు నాగవైష్ణవి కిడ్నాప్ కేసులో పోలీసులు నలుగురు వ్యక్తులను అదుపులోకి తీసుకున్నట్లు తెలుస్తోంది. తాడేపల్లి మండలం సీతానగరం గేటు వద్ద దుండగులు వదిలి వెళ్లిన కారును పోలీసులు స్వాధీనం చేసుకున్నారు. ఆ కారులో దుండగులు రాసిన లేఖ, వేష్ణవి గుర్తింపు కార్డు ఉన్నాయి. జాగిలాలతో గాలింపు చేపట్టిన పోలీసులు కేసు దర్యాప్తులో ప్రగతి సాధించారు. సీతానగరంలో శ్రీనివాస రావు, లక్ష్మీరమాదేవి అనే ఇద్దరిని అదుపులోకి తీసుకుని పోలీసులు ప్రశ్నించారు.

గాలి శీను, శ్యాం అనే ఇద్దరు రౌడీ షీటర్లను కూడా పోలీసులు అదుపులోకి తీసుకున్నట్లు తెలుస్తోంది. సీతానగరం నుంచి నిందితులు ప్రభాకర్ కూతురిని మారుతీ వ్యాన్ లో తీసుకుని గుంటూరు జిల్లా వినుకొండ వైపు వెళ్లినట్లు అనుమానిస్తున్నారు. తమను గుర్తించడం వల్లనే డ్రైవర్ లక్ష్మణరావును దుండగులు హత్య చేసినట్లు భావిస్తున్నారు. దుండగులు కారుపై దాడికి వాడిన రెండు బైక్ ల యజమానులను కూడా పోలీసులు గుర్తించారు. వారిలో ఒక వ్యక్తి సాంబమూర్తి కాగా, మరో వ్యక్తి రవికాంత్ అని తెలుస్తోంది. వారిని కూడా పోలీసులు ప్రశ్నించినట్లు సమాచారం.