'అదుర్స్' ను మళ్ళీ అడ్డుకున్న తెలంగాణ సేన

కామారెడ్డి: 'అదుర్స్‌' నిర్మాత కొడాలి నాని వ్యాఖ్యలకు నిరసనగా కామారెడ్డిలోని ప్రియా 35 ఎం ఎంలో ఆ సినిమా రెండో ఆట ప్రదర్శనను జేఏసీ నాయకులు అడ్డుకున్నారు. ప్రేక్షకులకు టికెట్టు డబ్బులను ఇప్పించి తిప్పి పంపారు. పక్కనే ఉన్న ప్రియా 70ఎంఎంలోని 'నమో వెంకటేశ' సినిమా ప్రదర్శననూ ఆపించారు. అక్కడి నుంచి శాంతి థియేటర్‌ వద్దకు వెళ్లి 'మాయాబజార్‌' చిత్ర ప్రదర్శనను సైతం నిలిపివేయించారు.

అనంతరం దర్శన్‌ థియేటర్‌ వద్ద కు వచ్చి 'యుగానికొక్కడు' సినిమా ప్రదర్శన నిలిపివేయాలని డిమాండ్‌ చేశారు. ప్రదర్శన నిలిపివేయడంలో జాప్యం జరుగుతుండడంతో ఆగ్రహించిన ఓ గుర్తు తెలియని వ్యక్తి థియేటర్‌ అద్దాలను ధ్వంసం చేశాడు. దీంతో కొద్ది సేపు ఉద్రిక్త పరిస్థితి నెలకొంది. విషయం తెలుసుకున్న పట్టణ ఎస్సై శంకరయ్య పరిస్థితిని సమీక్షించారు. ఉద్రిక్త పరిస్థితుల నేపథ్యంలో పట్టణంలోని కమల్‌, సుభాష్‌ థియేటర్ల యాజమాన్యాలు చిత్ర ప్రదర్శనలను అర్ధంతరం గా నిలిపివేశాయి.