చెప్పడానికి కెసిఆర్ ఎవరు: శంకరరావు

హైదరాబాద్: రాజీనామాలు చేయాలని అడగడానికి తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు ఎవరని కాంగ్రెసు సీనియర్ శాసనసభ్యుడు పి. శంకర రావు ప్రశ్నించారు. తెలంగాణ ప్రజాప్రతినిధులు రాజీనామాలు చేయాలని కెసిఆర్ అనడంపై ఆయన శనివారం మీడియా ప్రతినిధుల సమావేశంలో తీవ్రంగా మండిపడ్డారు. తమ రాజీనామాలు అడగడానికి కెసిఆర్ తమకు ఏమైనా టికెట్లు ఇచ్చాడా అని ఆయన అడిగారు. తమకు కాంగ్రెసు పార్టీ అధ్యక్షురాలు సోనియా గాంధీ టికెట్లు ఇచ్చారని, సోనియా తెలంగాణ ఇస్తారని ఆయన అన్నారు.

ప్రజలు రాజీనామాలు కోరడం లేదని, పదవుల్లో ఉండే తెలంగాణ కోసం పోరాటం చేయాలని ఆశిస్తున్నారని ఆయన అన్నారు. దీనిపై ఎలాంటి సర్వే చేయించినా తనకు అభ్యంతరం లేదని ఆయన అన్నారు. రాజీనామాలు చేసి రాజ్యాంగ సంక్షోభం సృష్టించడం సరైంది కాదని ఆయన అన్నారు.