యూరియా ధరపై కేంద్రానికి లేఖ: సిఎం

హైదరాబాద్: యూరియా ధర పెంపుపై పునరాలోచన చేయాలని తాను కేంద్రానికి లేఖ రాస్తానని ముఖ్యమంత్రి కె. రోశయ్య తెలిపారు. శాసనసభ ప్రశ్నోత్తరాల సమయంలో ఆయన శుక్రవారం ఈ విషయం చెప్పారు. రైతు సంక్షేమం కోరే ప్రతి ఒక్కరు ఎరువుల ధరనలు పెరుగుదలను వ్యతిరేకిస్తారని ఆయన అన్నారు. యూరియా ధర పెంపుపై కేంద్ర ప్రభుత్వానికి తమ అభిప్రాయాన్ని మాత్రమే చెప్పగలమని ఆయన అన్నారు. యూరియా ధర తగ్గింపుపై కేంద్రానిదే తుది నిర్ణయమని ఆయన అన్నారు.

అంతకు ముందు ప్రతిపక్షాలు ప్రతిపాదించిన వాయిదా తీర్మానాలను స్పీకర్ కిరణ్ కుమార్ రెడ్డి తిరస్కరించారు. దీంతో తీవ్ర నిరసన వ్యక్తమైంది. యూరియా ధర పెంపుపై తక్షణమే చర్చించాలని తెలుగుదేశం సభ్యులు పట్టుబట్టారు. కేంద్రం తీసుకున్న నిర్ణయంపై మాట్లాడడం కుదరదని, సమయాన్ని బట్టి చర్చకు అవకాశం ఇస్తామని స్పీకర్ చెప్పారు. అయినా తెలుగుదేశం సభ్యులు వినకపోవడంతో సభా కార్యక్రమాలకు అంతరాయం ఏర్పడింది. దీంతో స్పీకర్ సభను పది నిమిషాల పాటు వాయిదా వేశారు.