రోడ్డు ప్రమాదంలో 8 మంది దుర్మరణం

నల్లగొండ: నల్లగొండ జిల్లాలో సోమవారం ఉదయం జరిగిన ఘోర రోడ్డు ప్రమాదంలో 8 మంది మరణించారు. మరో ఐదుగురు గాయపడ్డారు. గాయపడినవారిలో నలుగురి పరిస్థితి ఆందోళనకరంగా ఉంది. మృతుల్లో నలుగురు చిన్నారులున్నారు. నల్లగొండ జిల్లా మోతె - నామవరం గ్రామాల మధ్య ఎదురెదురుగా వస్తున్న లారీ - ఆటో ఢీకొనడంతో ఈ ప్రమాదం సంభవించింది. గాయపడినవారిని సూర్యాపేట ఏరియా ఆస్పత్రికి తరలించారు.

సూర్యాపేట నుంచి ఖమ్మం వెళ్తున్న లారీ ఖమ్మం వైపు నుంచి సూర్యాపేట వస్తున్న ఆటోను ఢీకొట్టింది. లారీ వేగంగా వస్తుండడంతో ఆటో పూర్తిగా ధ్వంసమైంది. ఆటోలోని ప్రయాణికులంతా అక్కడికక్కడే మరణించారు. మృతి చెందిన ఆటో డ్రైవర్ నామవరం గ్రామానికి చెందినవాడని తెలుస్తోంది. ప్రమాదం జరిగిన వెంటనే లారీ డ్రైవర్ పారిపోయాడు. పోలీసులు కేసు నమోదు చేసుకుని దర్యాప్తు చేస్తున్నారు.