కెవిపికి ప్రాధాన్యంపై హర్షకుమార్ అలక

న్యూఢిల్లీ: రాజ్యసభ సభ్యుడు, రాష్ట్ర ప్రభుత్వ సలహాదారు కెవిపి రామచందర్ రావుకు ఇస్తున్న ప్రాధాన్యంపై కాంగ్రెసు పార్టీ అమలాపురం పార్లమెంటు సభ్యుడు హర్షకుమార్ తీవ్ర ఆగ్రహం వ్యక్తం చేశారు. పార్టీ సంస్థాగత ఎన్నికల కార్యక్రమం, సభ్యత్వ నమోదుపై పార్టీ పార్లమెంటు సభ్యులతో బుధవారం సాయంత్రం పిసిసి అధ్యక్షుడు డి శ్రీనివాస్ ఎపి భవన్‌లో ఏర్పాటు చేసిన సమావేశం నుంచి ఆయన వాకౌట్ చేశారు.

సమావేశంలో పిసిసి అధ్యక్షుడి ప్రక్కనే ప్రభుత్వ సలహాదారు, రాజ్యసభ సభ్యుడు కెవిపి రామచందర్ రావు కూర్చుని ఉండడం చూసిన హర్షకుమార్ బయటకువచ్చారు. కాంగ్రెస్ ఎంపిల కన్వీనర్ పొన్నం ప్రభాకర్‌ ను కూడా ఆయన బయటకు రమ్మని పిలిచి తన ఆక్షేపణ వెలిబుచ్చారు. ప్రభుత్వ సలహాదారు పదవిలోనూ, ఏఐసిసి ఏర్పాటు చేసిన సమన్వయ కమిటీలోనూ కెవిపికి స్థానం కల్పించడంపై తాను ఇదివరకే తీవ్ర నిర సన వ్యక్తం చేశానని ఆయన అన్నారు. ఈ పరిస్థితుల్లో తాను కెవిపికి ప్రాధాన్యం ఇవ్వడాన్ని జీర్ణించుకోలేకే సమావేశం నుంచి బయటకు వెళ్లిపోతున్నానని ఆయన ప్రభాకర్‌కు చెప్పారు.