కొండవీడు కోట వద్ద రియల్ ఎస్టేట్ బూమ్

గుంటూరు: గుంటూరు నగరానికి 25 కిలోమీటర్ల దూరంలో ఉన్న కొండవీడు కోట ప్రపంచ పర్యాటక కేంద్రంగా రూపొందించేందుకు ప్రభుత్వం, స్వచ్ఛంద సంస్థలు ముందుకువచ్చాయి. దీంతో కోట ప్రాంతంలోని భూ ముల ధరలు ఐదురెట్లు పెరిగాయి. మండలంలోని కొత్తపాలెం, కొండవీడు, కోట, చెంగిజ్‌ఖాన్ ‌పేట, సంగంగోపాలపురం, బోయపాలెం పరిధిలోని భూములకు విపరీతంగా ధరలు పెరిగాయి. దీంతో బ్రోకర్ల హడావుడి ఎక్కువైంది. కొండవీడు కొండపైకి ఘాట్‌రోడ్‌ ఏర్పాటుకు సర్వే నిర్వహించారు. పురాతన దేవాలయాలు, ప్రాచీన కట్టడాల పునరుద్దరణకు వివిధ ప్రభుత్వ శాఖల నుంచి రూ.12.5 కోట్లు విడుదల చేసింది. ఈనేప«థ్యంలో అంతర్జాతీయ కృష్ణచైతన్య సంస్థ కొండవీడుకోట, చెంగిజ్‌ఖాన్‌పేటల్లో ఆధ్యాత్మిక కేంద్రాలు, పలు అభివృద్ధి కార్యక్రమాలకు రూ.500 కోట్లు వెచ్చించేందుకు ముందుకొచ్చింది.

దీంతో భూములరేట్లు పెరిగాయి. సమీపంలో అంతర్జాతీయ స్థాయి స్పైసెస్‌ పార్క్‌ ఏర్పాటు, జాతీయ రహదారి ఉండటంతో బ్రోకర్లు భూముల రేట్లను ఏరోజుకారోజు పెంచుతున్నారు. వెంచర్లు వేసేందుకు కృష్ణా, ప్రకాశం, గుంటూరుజిల్లా వాసులేకాక తెలంగాణ ప్రాంతాలవారు వస్తున్నారు. కోట గ్రామంలో ఎకరం రూ.ఐదు లక్షలు ఉన్న భూమి రూ.25 లక్షల వరకు పెరిగింది. కొత్తపాలెం, కొండవీడులలో మొన్నటివరకు రూ.4.5 లక్షల వరకు ఉన్న భూమి రూ.14 ల క్షల వరకు పెరిగి ఆతర్వాత రూ.25 లక్షలకు చేరుకుంది. బోయపాలెం, చెంగిజ్‌ఖాన్‌పేటల్లో ఎక్కువ మొత్తంలో భూములు కొనుగోలు చేసి వెంచర్లు వేసేందుకు ప్రయత్నిస్తున్నారు.