అసెంబ్లీలో ఫ్రీజోన్ తీర్మానం ఆమోదం

హైదరాబాద్: హైదరాబాద్ జిల్లా ఫ్రీజోన్ కాకుండా ఆరో జోన్ కిందికి వచ్చేలా రాష్ట్రపతి ఉత్తర్వులోని 14ఎఫ్ నిబంధనను తొలగించాలని కోరుతూ శాసనసభ గురువారం ఆమోదించింది. తీవ్ర గందరగోళం మధ్య శాసనసభలో ఈ తీర్మానాన్ని ఆమోదించింది. బుధవారం జరిగిన అఖిల పక్ష సమావేశంలో తీసుకున్న నిర్ణయం మేరకు తాను ఈ తీర్మానాన్ని ప్రతిపాదిస్తున్నట్లు ముఖ్యమంత్రి రోశయ్య చెబుతూ సభలో తీర్మానాన్ని ప్రతిపాదించారు. సభ ఆమోదం తర్వాత సభాధ్యక్ష స్థానంలో ఉన్న డిప్యూటీ స్పీకర్ నాదెండ్ల మనోహర్ సభను వాయిదా వేశారు.

తీర్మానాన్ని వ్యతిరేకిస్తూ సీమాంధ్ర శాసనసభ్యులు సభలో గొడవకు దిగారు. స్పీకర్ వెల్ లోకి దూసుకెళ్లే ప్రయత్నం కూడా చేశారు. వారు తీవ్ర అభ్యంతరం తెలిపారు. ఈ గందరగోళం మధ్యనే ముఖ్యమంత్రి తీర్మానాన్ని ప్రతిపాదించి ఆమోదింపజేసుకున్నారు. శాసనసభ చేసిన తీర్మానాన్ని తెలుగుదేశం రాయలసీమ శాసనసభ్యుడు పయ్యావుల కేశవ్ తీవ్రంగా వ్యతిరేకిందారు. దీన్ని విద్రోహ చర్యగా ఆయన మీడియా ప్రతినిధుల సమావేశంలో ఆరోపించారు. తెలంగాణ జిల్లాలకు కూడా దీని వల్ల నష్టం జరుగుతుందని ఆయన అన్నారు. ముందే నిర్ణయించుకున్న ప్రకారం తీర్మానం ప్రతిపాదించారని ఆయన అన్నారు.