రాష్ట్రంలో అసెంబ్లీ ఉప ఎన్నికలు జులైలో?

న్యూఢిల్లీ: రాష్ట్రంలో కొత్త ఓటర్ల నమోదు ప్రక్రియ పూర్తయిన తర్వాత ఉప ఎన్నికలు నిర్వహించాలని కేంద్ర ఎన్నికల సంఘం ప్రాథమిక అంచనాకు వచ్చినట్లు తెలిసింది. శనివారం ఎన్నికల సంఘం సమావేశంలో ప్రధాన కమిషనర్‌ నవీన్‌చావ్లా, కమిషనర్‌ సంపత్‌లు రాష్ట్ర పరిస్థితులను సమీక్షించినట్లు తెలుస్తోంది.

జనవరి 1 నాటికి 18 ఏళ్లు నిండిన వారిని ఓటర్లుగా చేర్పించే కార్యక్రమం జులై మొదటి వారంతో ముగుస్తుందని రాష్ట్ర ఎన్నికల అధికారి చెప్పిన నేపథ్యంలో ఆ తర్వాతే ఉప ఎన్నికలు నిర్వహిస్తే బాగుంటుందని ఎన్నికల సంఘం అభిప్రాయానికొచ్చినట్లు తెలిసింది. తెరాస, భాజపా, తెదేపా ఎమ్మెల్యేలు 12 మంది ఫిబ్రవరి 15న రాజీనామాలు చేశారు. ఆగస్టు 15లోపు ఆ స్థానాలకు ఉప ఎన్నిక నిర్వహించాల్సి ఉంది.