బస్సు యాత్రకు వరంగల్ జిల్లా సమాయత్తం

వరంగల్‌: తెలంగాణ ఐక్య కార్యాచరణ కమిటీ(జేఏసీ) ఆధ్వర్యంలో ప్రారంభించిన ఉద్యమయాత్రను జిల్లాలో విజయవంతం చేసేందుకు సన్నాహాలు చేస్తున్నారు. తెలంగాణ ప్రజలను సంఘటితం చేస్తూ ప్రజా ఐక్యతను చాటిచెప్పేందుకు బస్సు యాత్ర నిర్వహిస్తున్న విషయం విదితమే. ఈ యాత్రను విజయవంతం చేయాలని కోరుతూ నగరంలో సోమవారం ద్విచక్రవాహనాల ర్యాలీ నిర్వహించేందుకు సిద్ధమవుతున్నారు.

కాజీపేట నుంచి కాశీబుగ్గ వరకు ఈ ర్యాలీ నిర్వహించాలని జిల్లా జేఏసీ భాగస్వామ్య పక్షాలు నిర్ణయించాయి. జేఏసీ చైర్మన్‌ ప్రొఫెసర్‌ కోదండరాం నేతృత్వంలో హైదరాబాద్ లో ప్రారంభమైన బస్సు యాత్ర మంగళవారం జిల్లాలోకి ప్రవేశించనుంది. ఈ ఉద్యమ యాత్రకు జిల్లాతో పాటు నగరంలో ఘనంగా స్వాగతం పలికేందుకు జేఏసీ భాగస్వామ్య సంఘాలు, తెలంగాణ వాదులు, సంస్థలు కృషి చేస్తున్నాయి. ముందు గా హన్మకొండలో బహిరంగసభ ఏర్పాటు చేయాలని భావించినా తర్వాత విరమించుకున్నారు.