జైలు నుంచి నరహంతకుడు రామారావు పరారీ

శ్రీకాకుళం: ఏడు హత్య కేసుల్లో నిందితుదడైన రుద్రాక్షపల్లి నరహంతకుడు తాడిపత్రి రామారావు శుక్రవారం మధ్యాహ్నం శ్రీకాకుళం సబ్ జైలు నుంచి తప్పించుకుని పరారయ్యాడు. దొంగతనం కేసులో రామారావును శ్రీకాకుళం పోలీసులు రామారావును అరెస్టు చేశారు. రుద్రాక్షపల్లి గ్రామంలో దారుణ హత్యలకు అతను పాల్పడ్డాడు. రామారావు జైలు నుంచి పారిపోవడం ఇది ఏడోసారి.

ఖమ్మం జిల్లా రుద్రాక్షపల్లి గ్రామానికి చెందిన రామారావు గతంలో కృష్ణా జిల్లా నూజివీడు జైలు నుంచి కూడా పారిపోయాడు. అప్పుడు పరారై అతను రుద్రాక్షపల్లిలో మారణహోమం సృష్టించాడు. తమ గ్రామంపై రామారావు దాడి చేస్తాడమోనని ప్రజలు భయాందోళనకు గురవుతున్నారు. రామారావు పరారీ సమాచారం అందిన వెంటనే కృష్ణా, ఖమ్మం జిల్లా పోలీసులు అప్రమత్తమయ్యారు. రామారావును పట్టుకోవడానికి మూడు పోలీసు బృందాలను రంగంలోకి దించారు.