మనోరమను అవమానించలేదు: ధర్మారెడ్డి

తిరుమల: సినీ నటి మనోరమను తమ సిబ్బంది అవమానించలేదని తిరుమల తిరుపతి దేవస్థానం (టిటిడి) ప్రత్యేకాధికారి ధర్మారెడ్డి స్పష్టం చేశారు. తిరుమలలో మనోరమకు పరాభవం జరిగిందని వచ్చిన వార్తలను ఆయన ఖండించారు. తాము సకాలంలోనే ఆమె వసతికి ఏర్పాట్లు చేశామని ఆయన శనివారం మీడియా ప్రతినిధులతో చెప్పారు. తాము వసతి సౌకర్యం కల్పిస్తామని చెప్పినా ఆమె వినలేదని ఆయన చెప్పారు.

సుదర్శనం టోకెన్లను రద్దు చేసినట్లు ఆయన తెలిపారు. కాలినడక వచ్చే భక్తులకే టోకెన్లు ఇస్తామని చెప్పారు. తిరుమల శ్రీవారి దర్శనానికి వచ్చిన మనోరమకు పరాభవం ఎదురైందని వార్తలు వచ్చాయి. ఆమెకు వసతి సౌకర్యం కల్పించడంలో టిటిడి సిబ్బంది నిర్లక్ష్యం ప్రదర్శించారనే విమర్సలు వచ్చాయి. అయితే మనోరమ మాట్లాడిన తీరు ఆమె మానసిక పరిస్థితి సరిగా లేనట్లు అర్థమవుతోంది.