కేశవరావుతో తెరాస నేత వినోద్ భేటీ మతలబు ఏమిటి?

హైదరాబాద్: కాంగ్రెసు సీనియర్ నేత కె. కేశవరావుతో తెలంగాణ రాష్ట్ర సమితి (తెరాస) మాజీ పార్లమెంటు సభ్యుడు వినోద్ కుమార్ భేటీపై పలు ఊహాగానాలు చెలరేగుతున్నాయి. వినోద్ గురువారం కేశవరావుతో సమావేశమయ్యారు. తమ భేటీకి రాజకీయ ప్రాధాన్యం ఏమీ లేదని, తెలంగాణ ఆర్ట్ మ్యూజియాన్ని ఇతర రాష్ట్రాల్లో ప్రారంభించే విషయంపై మాట్లాడామని వినోద్ అన్నారు. అయితే, ఆ మాటలను నమ్మడానికి వీలు లేదని అంటున్నారు. రాజకీయాలే వారిద్దరి మధ్య చర్చకు వచ్చినట్లు భావిస్తున్నారు.

తెలంగాణలోని 12 శాసనసభ నియోజకవర్గాలకు ఉప ఎన్నికలు జరుగుతుండడం, ఈ ఉప ఎన్నికల్లో పోటీ చేయాలని కాంగ్రెసు పార్టీ నిర్ణయించుకోవడం వల్ల కేశవరావుతో వినోద్ భేటీకి ప్రాధాన్యం చేకూరినట్లు భావిస్తున్నారు. కాంగ్రెసు పార్టీ అధిష్టానం వద్ద కేశవరావుకు పలుకుబడి ఉన్న విషయం అందరికీ తెలిసిందే. తెరాస తరఫున ఉప ఎన్నికలకు సంబంధించి కాంగ్రెసుకు తెరాస అధ్యక్షుడు కె. చంద్రశేఖర రావు వినోద్ ద్వారా కేశవరావుకు సమాచారం అందించినట్లు చెబుతున్నారు.