మొయిలీకి నేడు వైయస్ జగన్ పై కాంగ్రెసు సీనియర్ల ఫిర్యాదు

హైదరాబాద్: తమ పార్టీ రాష్ట్ర వ్యవహారాల ఇంచార్జీ వీరప్ప మొయిలీకి కడప పార్లమెంటు సభ్యుడు వైయస్ జగన్ పై ఫిర్యాదు చేసేందుకు కాంగ్రెసు పార్టీ సీనియర్లు సమాయత్తమవుతున్నారు. మొయిలీ శుక్రవారం హైదరాబాద్ వస్తున్నారు. తాను రచించిన పుస్తకం తెలుగు అనువాదాన్ని శుక్రవారం ఆవిష్కరించనున్నారు. ఆయన శుక్రవారం మధ్యాహ్నం నగరానికి వచ్చి సాయంత్రం రవీంద్రభారతిలో జరిగే పుస్తకావిష్కరణ కార్యక్రమంలో పాల్గొంటారు.

పుస్తకావిష్కరణకు వస్తున్న మొయిలీని లేక్‌వ్యూ అతిథి గృహంలో కలిసి రాష్ట్ర పరిస్థితులు వివరించేందుకు కాంగ్రెసు నేతలు సమాయత్తమవుతున్నారు. జగన్‌ యాత్ర వల్ల పార్టీలో లేనిపోని గందరగోళం తలెత్తుతోందని, ఇది పార్టీకి నష్టం కలిగిస్తుందని సీనియర్లు ఆయనకు ఫిర్యాదు చేయనున్నారు. ఇదే సమయంలో జగన్‌ వర్గీయులు కూడా మొయిలీని కలవాలనే ఆలోచనతో ఉన్నారు.