మహాందోళన: బాబు సతీమణి భువనేశ్వరి బహిరంగ లేఖ

హైదరాబాద్: తన భర్త సహా తెలుగుదేశం నాయకుల ఆరోగ్యం, భద్రత పట్ల ఆందోళన వ్యక్తం చేస్తూ చంద్రబాబు నాయుడు సతీమణి భువనేశ్వరి ప్రజలకు మంగళవారం బహిరంగ లేఖ విడుదల చేశారు. తెలుగుదేశం పార్టీ బాబ్లీ వ్యతిరేక పోరాటం చేయాల్సిన అవసరం ఎందుకు ఏర్పడిందనే విషయం నుంచి వ్యక్తిగత విషయాల వరకు ప్రస్తావిస్తూ ఆమె ఆ లేఖ రాశారు. చంద్రబాబుకు గానీ, ఇతర తెలుగుదేశం నాయకులకు ఏమైనా జరిగితే కేంద్ర, రాష్ట్ర ప్రభుత్వాలు, మహారాష్ట్ర ప్రభుత్వం బాధ్యత వహించాల్సి ఉంటుందని ఆమె అన్నారు. ఐదు రోజులుగా మహారాష్ట్ర పోలీసులు తెలుగుదేశం నాయకుల పట్ల అప్రజాస్వామికంగా, హింసాత్మకంగా వ్యవహరిస్తోందని ఆమె అన్నారు.

తెలుగుదేశం నాయకుల పట్ల మహారాష్ట్ర పోలీసులు దౌర్జన్యంగా, అమానుషంగా వ్యవహరిస్తున్నారని ఆమె విమర్శించారు. మహారాష్ట్ర ప్రభుత్వ స్పందన సరిగా లేదని ఆమె విమర్శించారు. చంద్రబాబు అరెస్టుతో మనస్తాపానికి గురై తెలుగుదేశం పార్టీ కార్యకర్తలు ఆత్మహత్యలు చేసుకోవడం పట్ల ఆమె తీవ్రంగా ప్రతిస్పందించారు. ఉద్వేగానికి లోను కావద్దని, ఆత్మహత్యలకు పాల్పడవద్దని ఆమె పార్టీ కార్యకర్తలకు, చంద్రబాబు అభిమానులకు విజ్ఞప్తి చేశారు. తెలుగుదేశం పార్టీ బాబ్లీ వ్యతిరేక ఉద్యమం ఎందుకు చేపట్టాల్సి వచ్చిందో కూడా భువనేశ్వరి ఆ లేఖలో వివరించారు.