తెలంగాణ పార్లమెంటు సభ్యులకు చిదంబరం మొండిచెయ్యి?

న్యూఢిల్లీ: తెలంగాణ ఉద్యమం సందర్భంగా విద్యార్థులపై పెట్టిన కేసులను ఎత్తేసే విషయంలో కేంద్ర హోం మంత్రి పి. చిదంబరం కాంగ్రెసు తెలంగాణ పార్లమెంటు సభ్యులకు మొండిచేయి చూపినట్లు సమాచారం. గుత్తా సుఖేందర్ రెడ్డి, జి. వివేక్, రాజయ్య తదితర తెలంగాణ ఎంపిలు గురువారం చిదంబరాన్ని కలిశారు. విద్యార్థులపై కేసులు ఎత్తేస్తామని గతంలో చిదంబరం హామీ ఇచ్చారు. ఆ హామీ ఏడెనిమిది నెలలుగా అమలు కాలేదు. దీంతో పార్లమెంటు సభ్యులు చిదంబరాన్ని కలిశారు. కేసుల ఎత్తివేత రాష్ట్ర పరిధిలోదని, అయితే రాష్ట్ర ప్రభుత్వానికి ఆ విషయంపై లేఖ రాస్తానని మాత్రం చిదంబరం వారితో చెప్పినట్లు తెలుస్తోంది.

విద్యార్థులపై కేసు ఎత్తివేత విషయంలో తమ విజ్ఞప్తికి చిదంబరం సానుకూలంగా ప్రతిస్పందించినట్లు భేటీ అనంతరం పార్లమెంటు సభ్యులు మీడియా ప్రతినిధులతో చెప్పారు. ఇందుకు సంబంధించి రాష్ట్ర ప్రభుత్వానికి లిఖిత పూర్వక లేఖ రాస్తాని చిదంబరం చెప్పినట్లు ఆయన తెలిపారు. తెలంగాణ సాయుధ పోరాటంలో పాల్గొన్న తెలంగాణ స్వాతంత్ర్య సమరయోధులకు పింఛన్లు ఇవ్వాలని హోం మంత్రిని కోరినట్లు మంద జగన్నాథం, గుత్తా సుఖేందర్ రెడ్డి చెప్పారు. పార్లమెంటులో తెలంగాణ బిల్లు పెట్టి రాష్ట్రాన్ని ఏర్పాటు చేయాలని కూడా కోరినట్లు వివేక్ చెప్పారు.