ప్రధాని మన్మోహన్ సింగ్ ఎపి పర్యటన మళ్లీ వాయిదా

తిరుపతి: ప్రధాని డాక్టర్ మన్మోహన్ సింగ్ ఆంధ్రప్రదేశ్ పర్యటన మళ్లీ వాయిదా పడింది. ప్రధాని చిత్తూరు జిల్లా పర్యటన ఇప్పటికీ అధికారికంగా ఖరారు కాలేదని తిరుపతి పార్లమెంటు సభ్యుడు చింతా మోహన్‌ తెలిపారు. మొదట ఈనెల 31న అనుకున్న ప్రధాని పర్యటన సెప్టెంబర్‌ 1వతేదీకి వాయిదా పడింది. ఒకవేళ ఏఐసీసీ అధ్యక్ష ఎన్నికకు సోనియా నామినేషన్‌ను సెప్టెంబర్‌ 1న వేస్తే ప్రధాని పర్యటన కూడా ఒకరోజు ముందుకు మారవచ్చని చింతా మోహన్ అన్నారు.

చిత్తూరు జిల్లాలో ప్రధాని మన్మోహన్ సింగ్ మన్నవరం ప్రాజెక్టుకు శంకుస్థాపన చేయాల్సి ఉంది. తిరుపతి విమానాశ్రయం విస్తరణ పనులకు కూడా ఆయన శ్రీకారం చుట్టాల్సి ఉంది. కాగా, ఢిల్లీ పర్యటన ముగించిన హైదరాబాద్ వచ్చిన గవర్నర్ నరసింహన్ తో కె. రోశయ్య భేటీ అయ్యారు. తాజా రాజకీయ పరిణామాలపై, ప్రధాని రాష్ట్ర పర్యటనపై వారిద్దరి మధ్య చర్చలు జరిగినట్లు తెలుస్తోంది.